نئی دہلی: 11 ؍ ستمبر (انٹر نیٹ ڈیسک)
سپریم کورٹ کی وکیل رینو سنہا کی مشتبہ موت کے معاملہ کو پولیس نے حل کرلیا ہے۔ پولیس نے نتیجہ اخذ کیا کہ اس کے شوہر نتن ناتھ سنہا نے ہی خاتون وکیل کا قتل کیا ہے۔
پولیس کا کہنا ہے کہ بنگلے کی فروخت کو لے کر میاں بیوی کے درمیان اختلافات پیدا ہوئے اور یہی وکیل کے قتل کی وجہ بنی۔
تفصیلات کے مطابق.. سپریم کورٹ کی وکیل رینو سنہا اپنے شوہر نتن ناتھ سنہا کے ساتھ نوئیڈا سیکٹر 30 میں ایک بنگلے میں رہ رہی تھی۔ لیکن وہ دو دن سے لاپتہ تھی۔ رینو کے بھائی کی شکایت کے بعد پولیس نے تفتیش کا آغاز کیا۔
جب پولیس نے پہنچ کر وکیل کے بنگلے کی تلاشی لی تو اس کی نعش باتھ روم سے ملی۔ یہ واقعہ ہفتہ کو پیش آیا تھا۔ لیکن اس کے شوہر نتن کا کہیں پتہ نہیں چلا۔ جب نتن کا فون نمبر ٹریک کیا گیا تو اسے وکیل کے بنگلے میں دکھایا گیا۔ اس کے نتیجے میں پولیس نے پورے بنگلے کی تلاشی لی اور نتن کو اسٹور روم سے پکڑ لیا۔
پولیس نے بتایا کہ نتن اپنی بیوی کو قتل کرنے کے بعد تقریباً 36 گھنٹے تک اسٹور روم میں چھپا رہا۔ حال ہی میں نتن نے بنگلہ بیچ کر خریدار سے پیسے لیے۔ لیکن پولیس نے انکشاف کیا کہ رینو سنہا بنگلہ بیچنے کو تیار نہیں تھی اور اس بات پر دونوں کے درمیان اکثر جھگڑے ہوتے رہتے تھے۔
