الہ آباد : 03 ؍ اگست (اپنا وطن نیوز ڈیسک)
الہ آباد ہائی کورٹ نے جمعرات کو مسلم فریق کی عرضی کو خارج کر دیا اور آرکیالوجیکل سروے آف انڈیا (اے ایس آئی) کو وارانسی میں گیانواپی مسجد کمپلیکس کا سروے کرنے کی اجازت دی۔
ہائی کورٹ نے 21 جولائی کو وارانسی کی ضلعی عدالت کے ایک حکم کے خلاف، جس نے کمپلیکس کے اے ایس آئی کے سروے کی اجازت دی تھی، انجمن انتظامیہ مسجد کمیٹی کی درخواست پر اپنا فیصلہ سنایا۔
ہائی کورٹ نے اس معاملے پر فیصلہ سناتے ہوئے کہا کہ "انصاف کے مفاد میں سائنسی سروے ضروری ہے۔”
ہندو درخواست گزاروں کی طرف سے پیش ہونے والے ایک وکیل نے پہلے انتباہ دیا تھا کہ اگر فیصلہ ان کے خلاف آیا تو وہ سپریم کورٹ سے رجوع کریں گے۔
ہندو فریق کے وکیل سوربھ تیواری کا حوالہ دیتے ہوئے پی ٹی آئی نے کہا، "سروے وہاں (گیانواپی مسجد کمپلیکس) کرایا جانا چاہیے۔ اگر فیصلہ ہمارے خلاف آتا ہے، تو ہم سپریم کورٹ سے رجوع کریں گے۔”
قبل ازیں آرکیالوجیکل سروے آف انڈیا کے عہدیداران نے عدالت میں تحریری حلف نامہ داخل کیا تھا کہ ان کے سروے سے مسجد میں کسی قسم کا نقصان نہیں پہنچے گا۔
آل انڈیا مسلم پرسنل لا بورڈ کے رکن مولانا خالد رشید فرنگی محلی کا کہنا ہے کہ الہ آباد ہائی کورٹ کے حکم پر ASI کو وارانسی میں گیانواپی مسجد کمپلیکس کے سروے کی اجازت دی گئی ہے۔ہمیں امید ہے کہ انصاف کیا جائے گا کیونکہ یہ مسجد تقریباً 600 سال قدیم ہے اور مسلمان پچھلے 600 سالوں سے وہاں نماز ادا کر رہے ہیں۔
ہم یہ بھی چاہتے ہیں کہ ملک میں تمام عبادت گاہوں پر پلیس آف ورشپ ایکٹ نافذ کیا جائے۔
انھوں نے یہ بھی کہا کہ مسلم فریق الہ آباد ہائیکورٹ کے اس حکم کو سپریم کورٹ میں چیلنج کرنے کے بارے میں سوچے گا۔
