گوہاٹی : 18 ؍ جولائی (انٹرنیٹ ڈیسک)
آسام میں وزیر اعلیٰ ہمانتا بسوا سرما کے خلاف میاں برادری کے لوگوں کے بارے میں ان کے تبصرے پر ایف آئی آر درج کی گئی ہے۔
آسام سے راجیہ سبھا کے رکن پارلیمنٹ اجیت کمار بھویان نے وزیر اعلیٰ کے خلاف گوہاٹی کے دیسپور پولیس اسٹیشن میں ایف آئی آر درج کرائی اور آسام سمیلاگھو سنگرام پریشد نامی تنظیم نے پیر کو نوگاؤں صدر پولیس اسٹیشن میں وزیر اعلیٰ کے خلاف ایف آئی آر درج کرائی۔
ایم پی بھویاں نے وزیر اعلیٰ ہمانتا بسوا سرما کے خلاف درج کرائی گئی شکایت میں کہا ہے کہ سرما نے ایک خاص برادری کے خلاف نفرت انگیز تقریریں کی ہیں۔
انہوں نے کہا کہ ‘وزیر اعلیٰ نے ایک خاص برادری کو نشانہ بنایا ہے۔ جبکہ فرقہ وارانہ ریمارکس کرنے والوں کے خلاف سپریم کورٹ میں سخت قانون ہے، ایسے میں ہمنتا بسوا سرما کو ’’میاں برادری‘‘پر فرقہ وارانہ تبصرہ کرنے کا حق کس نے دیا؟
اسی وقت، آسوم سمیالگھو سنگرام پریشد نے الزام لگایا کہ چیف منسٹر کا اپنے ریمارکس میں ‘میاں-آسامی’ الفاظ کا استعمال سماجی ہم آہنگی کو نقصان پہنچاتا ہے اور برادریوں کے درمیان تقسیم کو فروغ دیتا ہے۔
اس معاملے کو لے کر سابق ایم پی اور ترنمول کانگریس آسام یونٹ کے صدر رپن بورا نے پیر کو ایک پریس کانفرنس کی اور آسام پولیس سے مطالبہ کیا کہ وزیر اعلیٰ سرما کے خلاف فوری کارروائی کی جائے۔
انہوں نے سپریم کورٹ (ڈبلیو پی (سی) نمبر 943/2021 اشونی کمار اپادھیائے بمقابلہ یونین آف انڈیا اینڈ او آر ایس) کے حکم کا حوالہ دیتے ہوئے کہا کہ آسام پولیس کے ڈائریکٹر جنرل کو اس معاملے میں سوموٹو ایکشن لینا چاہیے۔
وزیر اعلیٰ ہیمنتو بسواسرما نے کیا کہا تھا؟
آسام کے وزیر اعلیٰ ہمانتا بسوا سرما نے ریاست خصوصاً گوہاٹی میں سبزیوں کی قیمتوں میں اضافے کے لیے میاں مسلم تاجروں کو ذمہ دار ٹھہرایا تھا۔ جب صحافیوں کی جانب سے سبزیوں کی آسمان چھوتی قیمتوں کے بارے میں پوچھا گیا تو وزیر اعلیٰ نے کہا کہ کون لوگ ہیں جنہوں نے اس بار سبزیوں کی قیمتوں میں اتنا اضافہ کیا ہے، میاں ایک تاجر ہیں جو سبزیاں زیادہ قیمت پر فروخت کر رہے ہیں۔
آسام میں ‘میاں’ کا لفظ اکثر بنگالی نژاد مسلمانوں کے لیے استعمال ہوتا ہے۔ یہاں بنگالی نژاد مسلمانوں کی ایک بڑی آبادی سبزیوں اور مچھلیوں کا کاروبار کرتی ہے۔
آسامی کمیونٹی کے نوجوانوں سے آگے آنے اور ان کاموں میں بڑھ چڑھ کر حصہ لینے کی اپیل کرتے ہوئے، وزیر اعلیٰ نے کہا کہ وہ ذاتی طور پر گوہاٹی فلائی اوور کے نیچے بازاروں کو خالی کرائیں گے، کیونکہ گوہاٹی فلائی اوور کے نیچے زیادہ تر سبزیاں اور پھل فروخت ہوتے ہیں۔ پھل بیچنے والوں کا تعلق میاں مسلم کمیونٹی سے ہے۔
